Club de lectura de profesorado, con Samuel L. París

Onte celebramos a segunda xuntanza do club de lectura de profesorado, que conta con docentes do CEIP de Galán, EEI de Barrionovo, EEI de Vilarrodís-Oseiro e IES Pastoriza. Esta vez tivemos o pracer de ter connosco a Samuel L. París, autor do divertidísimo Pifostio. Falamos con Samuel dos nosos relatos favoritos do libro e coñecimos un pouco da súa traxectoria e proceso creativo. Moitas grazas pola visita!

 

Charlas na bibliogalán

Recentemente tiveron lugar dúas charlas de moito interese na bibligalán. 

O luns 9 de febreiro, os alumnos de 5º e 6º de Educación Primaria recibiron unha charla da fundación ENKI sobre a importancia do deporte como forma de inclusión e de derribar barreiras. 

O martes 10 de febreiro, o alumnado de 6º de Educación Primaria asistiu á biblioteca, onde puideron escoitar á persoa coordinadora da sección de doazón de órganos e transplantes do CHUAC e a unha persoa con transplante hepático sobre a importancia da doazón de órganos. 

Moitas grazas pola visita. 

Primeiro encontro do Club de Lectura de Profesorado

No primeiro trimestre reuniuse o club de lectura de profesorado formado por profesoras e profesores do CEIP de Galán, EEI Barrionovo, EEI de Vilarrodís-Oseiro e o IES Pastoriza. O libro que comentamos foi Salir a robar caballos, do autor noruego Pet Petterson. Deunos a oportunidade de comentar os temas importantes da novela como a morte, a guerra, a soidade ou a masculinidade. 

Un apadriñamento lector antes das festas de inverno

 

Con  motivo das festas de inverno que se aproximaban, un dos últiumos días previos ás vacacións levamos a cabo un apadriñamento lector. O alumnado máis maior leu e compartiu un pouco de tempo e de conversa cos compañeiros e compañeiras de menor idade. Ambos prepararon un pequeno detalle para os seus padriños e madriñas ou apadriñados e apadriñadas. 

Máis reunións do club de alumnado

 

Esta semana os nosos clubs de lectura de alumnado reuníronse de novo para comentar as seguintes lecturas. "Os caracoliños" deron conta do cómic Snapdragon, que deu pé a un debate moi interesante. "Os marciáns lectores" estiveron comentando Milú e o edificio das persoas extraordinarias.