As lecturas elixidas foron Heartstopper en galego, unha historia que aborda con sensibilidade temas como a amizade, o amor e a identidade, e Wombo Combo de Paula Carballeira, unha obra que combina teatro e videoxogos nunha narración sorprendente e dinámica. Esta última lectura, ademais, encaixa perfectamente coa temática central das bibliotecas escolares este curso, que xira arredor do teatro.
Foi unha gran oportunidade para destacar a importancia de ler en galego e descubrir historias escritas ou traducidas á nosa lingua. A lectura en galego contribúe a fortalecer o noso idioma e a gozar de narracións que nos conectan coa cultura propia e coa diversidade de voces literarias.
Durante a sesión, falamos sobre as novas lecturas, compartimos impresións e reflexionamos sobre como a literatura pode conectar con outras formas de expresión como os videoxogos ou a escena teatral. Agora toca mergullarse nas páxinas e prepararse para os seguintes encontros, onde poderemos comentar e debater sobre estas historias.
