Pasamos o Día da Nena e a Ciencia na biblioteca

Nesta semana especial, a nosa biblioteca converteuse nun espazo de creatividade, descubrimento e homenaxe ás mulleres da ciencia. Todo o alumnado participou nunha actividade onde se convertiron en inventoras e inventores, imaxinando novos aparellos e solucións para mellorar a nosa vida. Cada nena e neno creou o seu propio invento, describindo para que serviría e debuxándoo nunha ficha. Os traballos están agora expostos na biblioteca para que toda a comunidade educativa poida velos e inspirarse con tantas ideas xeniais!

Pero a ciencia non quedou aí! Durante os recreos da semana, o alumnado do segundo ciclo de Educación Primaria tamén participou nun divertido Quen é quen? baseado nos libros de Pioneiras de Xerais. O alumnado voluntario axudou a organizar este xogo, no que as e os participantes tiñan que adiviñar científicas e inventoras a partir de pistas sobre os seus logros. Unha forma divertida de coñecer mulleres que fixeron historia na ciencia e na nosa terra!

Foi unha semana chea de aprendizaxe, imaxinación e recoñecemento ao papel das mulleres na ciencia e na innovación. Grazas a todos e todas por participar e facer desta conmemoración un momento especial! 

Obradoiro de ddakji: Recreos cheos de creatividade e diversión

Nos recreos da bibliogalán, o alumnado voluntario participou nun obradoiro moi especial para o resto de alumnado da escola, onde aprenderon a xogar e crear os seus propios ddakjis, un xogo tradicional coreano que combina habilidade e estratexia.

As nenas e nenos elaboraron as súas pezas dobrando follas de papel, seguindo o método orixinal do xogo, descubrindo como este xogo popular de Corea pode converterse nunha actividade divertida e colaborativa.

Ademais de aprender a xogar, cada unha delas e cada un  puido levar os seus ddakjis para compartir coas compañeiras e compañeiros, difundindo o espírito deste entretemento cultural. Foi unha experiencia enriquecedora que mesturou creatividade, xogo e aprendizaxe nun só espazo.

Recreos cheos de maxia na Bibliogalán

Na nosa biblioteca, cada recreo é unha oportunidade para aprender, crear, compartir e soñar. A Bibliogalán permanece aberta todos os días durante os recreos, converténdose nun espazo de referencia no que o alumnado pode gozar de múltiples propostas lúdicas e educativas grazas á colaboración do equipo de voluntariado e á supervisión do equipo de biblioteca.

Neste tempo de lecer, os nenos e nenas do centro poden facer préstamos de libros, desfrutar das últimas novidades ou perderse entre as páxinas do noso catálogo ou ler a prensa do día nos acolledores espazos de lectura. Pero a experiencia vai moito máis alá...

Nos recreos da Bibliogalán tamén se activan os nosos recursos STEAM, entre os que destacan:

• O pensamento computacional, a través de xogos de mesa específicos, robots de Lego e propostas de robótica educativa.

• A realidade aumentada, coa axuda de cubos máxicos, camisetas interactivas ou fichas animadas que permiten aprender xogando.

• O uso das tabletas, con acceso a aplicacións educativas seleccionadas para traballar aspectos como a atención, a memoria ou a lóxica.

• Os xogos de mesa e de cartas, como o exitoso Fantasma Blitz, que fan as delicias de pequenos e maiores.

• O espazo de creatividade e construcións con Kapla, que estimula a imaxinación e o traballo colaborativo.

• A observación en directo da nosa impresora 3D, que segue sorprendendo cos seus deseños e creacións.

• O acceso aos recursos de arte e expresión plástica, como rotuladores, lápices ou materiais para debuxar e crear sen límites.

E, por se fose pouco, cada día o noso equipo de voluntariado organiza actividades diferentes que dinamizan a biblioteca e a converten nun espazo vivo e participativo.

O acceso está organizado mediante un sistema de collares de cores, que permite controlar o aforo e garantir que a experiencia na biblioteca sexa segura, tranquila e enriquecedora para todas e todos.

Porque a Bibliogalán é un espazo libre, seguro e inclusivo, onde cada recreo se transforma nun mundo de posibilidades.