Unha benvida ao noso futuro alumnado

 

Hoxe vivimos unha xornada moi especial coa acollida dos nenos e nenas da EEI de Barrionovo e a EEI de Vilarrodís-Oseiro que o vindeiro curso estudarán 1º de Educación Primaria no CEIP de Galán. 

Ao longo da mañá, o alumnado e as súas familias tiveron a oportunidade de coñecer as instalacións da escola da que pronto formarán parte. Ademais, tivo lugar un apadriñamento lector entre o alumnado das escolas e aquel que estuda agora en 1º de Educación Primaria. Había moitas caras coñecidas!

A xornada continuou cunha actividade creativa, na que elaboraron unha chapa como recordo do día. Pero ese non foi o único agasallo que levaron.  A visita rematou cunha merendola compartida. 

Un día cheo de nervios e ilusión polos novos comezos. 

Un apadriñamento lector antes das festas de inverno

 

Con  motivo das festas de inverno que se aproximaban, un dos últiumos días previos ás vacacións levamos a cabo un apadriñamento lector. O alumnado máis maior leu e compartiu un pouco de tempo e de conversa cos compañeiros e compañeiras de menor idade. Ambos prepararon un pequeno detalle para os seus padriños e madriñas ou apadriñados e apadriñadas. 

As nenas e nenos de 6º de Infantil visitan o CEIP de Galán e a súa biblioteca

Esta semana recibimos no CEIP de Galán unha visita moi especial: o alumnado de 6º de Educación Infantil dos centros de Educación Infantil adscritos achegouse ao noso colexio para coñecelo... porque en setembro xa serán parte del!

Durante a mañá, puideron explorar as instalacións e facer unha parada moi especial na biblioteca, onde lles esperaban as nenas e nenos de 1º de Educación Primaria. Moitas caras coñecidas reencontráronse, xa que moitas destas novas lectoras e lectores foron compañeiras e compañeiros o curso pasado.

Nesta ocasión, exerceron de madriñas e padriños lectoras/es, lendo contos e, sobre todo, resolvendo dúbidas e curiosidades sobre o que lles agarda no seu novo colexio: como son as clases, o recreo, os libros, as mestras e mestres…

Foi unha xornada chea de emoción, lembranzas e ilusión polo que está por vir. Dámoslles a benvida con moita alegría ás futuras alumnas e alumnos do CEIP de Galán!

Celebramos o Día do Libro con apadriñamentos lectores

Celebramos no noso centro o Día do Libro cunha nova sesión de apadriñamentos lectores, unha actividade que enche de vida e ilusión a nosa biblioteca e as aulas.

Nesta ocasión, foi o alumnado de 2º e 3º ciclo de Educación Primaria quen fixo de madriñas e padriños lectoras/es das nenas e nenos de Educación Infantil e 1º ciclo de Educación Primaria. Moitas parellas repetiron a experiencia iniciada no apadriñamento de Nadal, mentres que outras se estrearon nesta actividade tan especial.

Desde comezos da semana, as madriñas e os padriños puideron achegarse á biblioteca para escoller con coidado os contos que compartirían. O día non estaba moi alá, así que decidimos facer a actividade dentro do colexio, buscando espazos tranquilos e acolledores para a lectura compartida.

Durante uns vinte minutos, o centro encheuse de contos, voces baixiñas, sorrisos e moita complicidade entre lectoras e lectores. Un tempo para gozar, para escoitar e para coidar esas pequenas grandes relacións que nacen arredor dos libros.

Grazas a todas as madriñas, padriños, afilladas e afillados por facer desta xornada un xeito tan fermoso de celebrar o poder da lectura.

Un apadriñamento lector cos mellores desexos

Co gallo das festas de inverno, levamos a cabo un novo apadriñamento lector, no que o alumnado de segundo e terceiro ciclo de Educación Primaria, compartiron momentos para lectura e conversas co alumnado de Educación Infantil e primeiro ciclo de Educación Primaria. Ademais, como remate de actividade, falaron sobre os seus desexos para o próximo ano 2025 que deixaron plasmados nunha estrela que forma parte da nosa constelación 2025 que preside o recibidor da escola.