BiblioGalán abre as súas portas no Día das Bibliotecas

Co gallo da celebración do Día das Bibliotecas, a nosa BiblioGalán, despois dunha formación de persoas usuarias, por fin pon en marcha toda a súa actividade programada para este curso 2022 - 2023. Toda esta programación esta recollida no Plan Anual de Lectura e que podedes consultar premendo aquí.

Así que, este 24 de outubro todas as nenas e nenos da escola tiveron ocasión de visitar o noso espazo posto que como principal novidade, este curso recuperamos os recreos na biblio, un proxecto que ten como obxectivo, proporcionar espazos activos de lectura e de recursos de creación de contido, especialmente co ollo posto nas competencias STEAM. Para iso, cada día, en cada recreo, contaremos con distintos recantos e obradoiros temáticos que estamos seguras e seguros, farán gozar a todas e todos nós. Esta semana, o centro de actividade proposto foron distintas tarefas relacionadas co mundo de Samaín. 

Para o bo desenvolvemento e funcionamento deste proxecto, contamos ca figura do alumnado voluntario, nenas e nenos de quinto e sexto de Educación Primaria que levan a cabo tarefas de control, dinamización, orde, etc. da nosa biblioteca. Unha axuda extraordinaria.

Pero a biblioteca non só está aberta durante os recreos, tamén recuperamos a súa actividade de tarde que próximamente virá acompañada dun novo proxecto para a nosa escola como é o préstamo en familia.

Durante a xornada lectiva, todas as titorías teñen un horario reservado para poder asistir e desenvolver na biblioteca todas as actividades que se propoñan ademáis, de levar a cabo o préstamo de fondos do noso catalogo. 

E falando de préstamos, as Mochilas Viaxeiras comezan a viaxar esta semana a todas as casas das nenas e dos nenos de Educación Infantil e primeiro ciclo de Educación Primaria. Esperamos que gocedes moito delas en familia. 

BiblioGalán tamén está aberta para toda a nosa comunidade educativa, polo que, dentro do proxecto de Contos na lareira, todas as familias, etc. poderedes vir a contarnos as historias que desexedes. Estamos desexando escoitarvos.

E para rematar, este ano estreamos os Clubes de lectura para alumnado. Nesta ocasión, nenas e nenos de sexto de Educación Primaria conforman dous clubes nos que compartiran as súas vivencias durante a lectura de ditos libros. Seguiremos todas as súas actividades neste blog. Pero non só as rapazas e rapaces de sexto teñen clubes de lectura, as mestras e mestres tamén continuamos co noso propio club, que xa está en marcha e do que tamén, moi pronto contaremos cousiñas.

Quedan moitas cousas das que falar que temos organizadas para este curso, pero cada cousiña no seu tempo. Agora, a gozar da nosa BiblioGalán, xa que estamos encantadas e encantados de volver a recibirvos a todas e todos nela!

BiblioGalán está de volta e con moitas novidades!

Ola a todas e a todos,

BiblioGalán está de volta e despois de un mes de setembro de posta a punto, aquí estamos comezando unha nova andaina no mundo da lectura no CEIP de Galán. 

Este curso será un curso de cambios, de novos proxectos, actividades e sobre todo, de vida na nosa BE, xa que despois de uns anos moi complexos para todas e todos, poderedes volver a ela, a gozar cos seus estantes cheos de libros e sobre todo, comezar a descubrir un novo espazo no que vos seredes as auténticas e os auténticos protagonistas das vosas aprendizaxes, un espazo deseñado específicamente para crear. 

Aproveitamos esta entrada no blog para presentarnos, xa que somos un novo equipo e é importante que nos coñezades para comentarnos todas e cada unha das propostas que teñades para a BE. Eu son Diego, o recente nomeado coordinador e o meu equipo de compañeiras marabillosas son Lucía, Mónica, Anais, Belén e Clara. Como dicimos, somos todo oídos, xa que xuntas e xuntos, faremos da BiblioGalán un espazo moi especial.

Entre as novidades que temos organizadas para este curso, ademáis de un novo mobiliario que estamos a espera da súa chegada, da apertura da BE a todas as titorías do centro así como á toda a comunidade educativa e como non, dunha dotación actualizada de fondos tanto de investigación como de literatura, é que comezaremos, de xeito progresivo, co proxecto de Mochilas viaxeiras. Unhas mochilas cheas de investigación, música e palabras que este ano, viaxaran polas casas das nenas e nenos de Educación Infantil e primeiro nivel de Educación Primaria. Quero volver a remarcar a importancia da comunidade educativa, porque toda ela, terá un papel moi importante nesta nova etapa da BE, a través de familias de conto e outras iniciativas que iremos coñecendo ao longo do curso. Esta BE é vosa tamén.

No centro tamén hai novidades, xa que este curso traballaremos e investigaremos todas e todos un mesmo tema. Enraizando Galán, o Proxecto Anual de Centro, que este ano promoverá en todas e todos nos un desenvolvemento sostible e un coñecemento da contorna natural do centro, que como sabedes, é impresionante.

Aproveitamos esta entrada de presentación para compartir con vos o Proxecto Anual de Lectura da nosa BE así como as liñas de actuación xerais que temos programadas e que van recollidas na Programación Xeral Anual do Centro. Unhas liñas que están deseñadas para facer da nosa BE un espazo de todas e todos para todas e para todos, sen importar os nosos intereses, estilos e preferencias de aprendizaxe, un lugar onde desenvolver de xeito natural as metodoloxías activas, competencias STEAM, ALFIN e AMI, sen perder en todo momento os obxectivos marcados pola Axenda 2030.

- Consulta aquí o Plan Anual de Lectura

- Consulta aquí os Obxectivos xerais recollidos na Programación Xeral Anual

Este blog será unha peza imprescindible para manter o contacto entre todas e todos vos coa nosa BE e ademáis dos comentarios, tedes dispoñible o noso enderezo electrónico para calquera cousiña que precisedes comentar, ceipgalanbiblioteca@gmail.com

Ata moi pronto, 

Equipo de BE do CEIP de Galán