Dentro do noso Proxecto Anual de Centro, recibimos na BiblioGalán a visita de ADECECO para coñecer como é o día a día das persoas con dano cerebral adquirido a través dunha serie de obradoiros sensoriais e unha historia moi ilustrativa por parte dos Bolechas.
Así que, este 24 de outubro todas as nenas e nenos da escola tiveron ocasión de visitar o noso espazo posto que como principal novidade, este curso recuperamos os recreos na biblio, un proxecto que ten como obxectivo, proporcionar espazos activos de lectura e de recursos de creación de contido, especialmente co ollo posto nas competencias STEAM. Para iso, cada día, en cada recreo, contaremos con distintos recantos e obradoiros temáticos que estamos seguras e seguros, farán gozar a todas e todos nós. Esta semana, o centro de actividade proposto foron distintas tarefas relacionadas co mundo de Samaín.
Para o bo desenvolvemento e funcionamento deste proxecto, contamos ca figura do alumnado voluntario, nenas e nenos de quinto e sexto de Educación Primaria que levan a cabo tarefas de control, dinamización, orde, etc. da nosa biblioteca. Unha axuda extraordinaria.
Pero a biblioteca non só está aberta durante os recreos, tamén recuperamos a súa actividade de tarde que próximamente virá acompañada dun novo proxecto para a nosa escola como é o préstamo en familia.
Durante a xornada lectiva, todas as titorías teñen un horario reservado para poder asistir e desenvolver na biblioteca todas as actividades que se propoñan ademáis, de levar a cabo o préstamo de fondos do noso catalogo.
E falando de préstamos, as Mochilas Viaxeiras comezan a viaxar esta semana a todas as casas das nenas e dos nenos de Educación Infantil e primeiro ciclo de Educación Primaria. Esperamos que gocedes moito delas en familia.
BiblioGalán tamén está aberta para toda a nosa comunidade educativa, polo que, dentro do proxecto de Contos na lareira, todas as familias, etc. poderedes vir a contarnos as historias que desexedes. Estamos desexando escoitarvos.
E para rematar, este ano estreamos os Clubes de lectura para alumnado. Nesta ocasión, nenas e nenos de sexto de Educación Primaria conforman dous clubes nos que compartiran as súas vivencias durante a lectura de ditos libros. Seguiremos todas as súas actividades neste blog. Pero non só as rapazas e rapaces de sexto teñen clubes de lectura, as mestras e mestres tamén continuamos co noso propio club, que xa está en marcha e do que tamén, moi pronto contaremos cousiñas.
Na entrada da escola contamos cun expositor de libros que ensalzan e empoderan a figura da muller así como poñen de manifesto a violencia contra elas, para que todo o alumnado, mestras, mestres e resto de comunidade educativa puidese consultar, levar en préstamos, ler nas súas aula, etc.
As mestras de terceiro de EP levaron a cabo unha lectura na nosa BE do conto O país dos mandóns, unha lectura que permitiu crear un espazo de debate, concienciación e didáctica da problemática.
O equipo da BE do CEIP de Galán
O venres 29 de outubro celebramos a festa do Samaín no centro e como non, na nosa BE. Organizado polo Equipo de Actividades Complementarias e Extraescolares (EACE) en colaboración ca biblioteca, as nenas e nenos da escola viviron unha xornada totalmente terrorífica. Ademais de participar durante toda a semana na creación artesá e tradicional de cabazas, que foron expostas no centro, o día da gran festa, asistiron a unha auténtica pasaxe do terror que remataba cun contacontos de medo.
As rapazas e rapaces do segundo e terceiro ciclo de Educación Primaria, prepararon a representación duns contos para as nenas e nenos de Educación Infantil, primeiro, segundo e terceiro nivel de Educación Primaria. Unha actividade de promoción e fomento da lectura que fíxonos gozar a todas e todos.
A seleccción de libros, en galego, non puido ser máis terroríficamente divertida con contos como Carabuñas, O Papón, Os esqueletos divertidos, A figueira de Pelostortos, Corre corre cabaciña, A bruxa regañadentes, Un pesadelo no meu armario, Os tres bandidos, A min non me comas ou Tío lobo.
Ademais dos libros para os contacontos, durante este mes, o noso alumnado tivo unha exposición relacionada ca festa do Samaín cunha selección de libros con moitas novidades para facer os seus préstamos e a que foi todo un éxito de movemento.
Dende o Equipo de BE do CEIP de Galán queremos dar as gracias a toda a nosa comunidade educativa pola participación nesta festa que tanto gusta ás nosas nenas e aos nosos nenos da escola, ao noso equipo de EACE que traballaron moito para facer unha pasaxe de terror absolutamente espectacular e por suposto ás nosas e aos nosos contacontos.
O equipo da BE do CEIP de Galán.
